भावनिक गुंतवणूक जितकी महत्त्वाची, तितकीच व्यावहारिक गुंतवणूकदेखील उपयोगाची, लाभाची. सध्याचे बँकिंग विश्व हे वेगाने, उत्तमोत्तम तंत्रज्ञानाने विस्तारित चालले आहे. डिजिटल बँकिंग हा परवलीचा शब्द बनला आहे. समृद्धीच्या दिशेने वाटचाल करणाऱ्या बँकिंग क्षेत्रातील अनेक महत्त्वपूर्ण घडामोडींचा अचूक वेध ‘पासबुक आनंदाचे’ या दिवाळी अंकात बँकिंग क्षेत्रातील मान्यवरांनी घेतला आहे. विशेष म्हणजे केवळ बँकेत काम करणाऱ्या आजी-माजी सेवक वर्गाच्या लेखनाने हा अंक साकारला आहे. श्रीकांत जोशी यांनी लिहिलेला ‘भारतीय बँकिंग : काल, आज आणि उद्या’ आणि चंद्रशेखर ठाकूर यांनी लिहिलेला ‘बँक आणि ग्राहकांच्या नजरेतून’ हे लेख अभ्यासपूर्ण आहेत. डिजिटल अॅप्स, गरज ई-साक्षरतेची, डिजिटल बँकिंगपुढे आव्हाने, बँकांचे विलीनीकरण हे लेखही वाचनीय आहेत. त्याचप्रमाणे काही सेवकांनी नित्य व्यवहारात आलेल्या काही गमतीजमती, किस्से शब्दबद्ध केले आहेत.
संपादक : नीलेश गायकवाड
(पासबुक आनंदाचे या दिवाळी अंकाचे ई-बुक बुकगंगा डॉट कॉमवरून खरेदी करण्यासाठी खालील लिंकवर क्लिक करा.)
